Buon Natale e Buon 2021
Anche Babbo Nadal se ga sentà
el speta che i ne disi che tuto xe passà
El se parla con la Befana
quasi ogni settimana
“Coss’te disi, se pol far?
Go le renne pronte, se pol ‘ndar?”
“Solo questo te digo
de ‘ste robe no me intrigo
ma le calze ormai me cuso
che sbusade le xe del loro uso.
Con la scova me go messo za a netar
drio de la poltrona, vizin al fogolar”
“De svolar no se parla ancora
mi go le renne pronte qua de fora
le sgrafa col zocolo per tera
– Andemo? Se movemo? O te vol guera?-”
Ma in quel riva un veceto
che li varda con un sorriseto
“Bravi, bravi, fazè i furbi?
Credè che ‘sta roba no me turbi?
Tuti e due senza mascherina…
no gavè ancora imparà la canzoncina?
Tuti insieme ormai a distanza
xe sta de ‘sto anno la nostra danza
ma tranquilli, passa tuto
quel che xe bel e quel che xe bruto.
Mi adesso vado, go fato tuto,
go tanto bazilà e son distruto.
De difender go zercà del pezo che rivava
come che go podù, ma no bastava.
Adesso riva el picio che finirà el lavor.
Mi za so, ciaperà lui l’onor
de gaver tuto risolto
e mi sarò sepolto
come el cativo de tuti i eventi
perché mi son….. el 2020!”
A Babbo Nadal e a la Befana no ghe resta che farse i auguri
che rivi presto quel che avvera i sogni futuri
ma a distanza i se tien e no i se brazza
ma i sventola tuti e due una straza:
xe el fazoleto che le lagrime ga ingrumà
de tuti quei che ‘sto anno ne ga lassà
perché ‘sto anno per tuti dificile xe stado
e dolor, tanto, ne ga portado
ma speremo che torni presto l’aurora
e che un giorno de bel sol ne speti là de fora
Anche noi un baso ve mandemo
e con le valigie pronte ve spetemo
per mandarve, con le dovute cautele,
in viaggio a quel Paese….ma con le bele!!
Perchè lontan o vizin poco ne importa
ma poder andar fora dela nostra porta
vol dir ricominciar a viver per benin
virus, pandemia o anche vaccin
che sia parole dimenticade, de una volta,
e che el 2021 sia per tuti la svolta
de tornar a saludarse, a darse la man
e de sorrider subito, indrio man
felici de vederse e de abbracciarse
senza la paura de contagiarse
perché la notte la par sempre più scura
e la ne fa ogni volta più paura
ma bisogna gaver un poca de pazienza
e la luce riverà, no staremo più senza
cussì coi nostri auguri qua finimo
e speremo che un novo cammino
ve porti tuti in viaggio dove che volè
e che in valigia con voi portè
un sorriso e un ricordo de un’agenzia…
Bagolandia…..la più strana che ci sia!